Argentina hökuməti çərşənbə günü bildirib ki, Braziliyada keçirilən seçkilərdə məğlub olan sağçı prezidentliyə namizəd Flavio Bolsonaro ölkədən qaçdıqdan sonra Ekvadora doğru yola düşüb.

Argentinanın Milli Miqrasiya İdarəsi "X" sosial şəbəkəsində bildirib ki, bazar günü Braziliyada keçirilən seçkilərin ikinci turunda Lula qarşısında məğlub olan Bolsonaro çərşənbə axşamı gecə saatlarında Argentinaya daxil olub və oradan Ekvadora uçan təyyarəyə minib.

İdarə əlavə edib ki, 45 yaşlı Bolsonaro Argentinaya "etibarlı səyahət sənədləri ilə və heç bir hüquqi maneə olmadan" daxil olub; halbuki məhkəmə onun ölkədən çıxışına qadağa qoyan qərar qəbul etmişdi.

Hökumət qurumu bildirib ki, Bolsonaro, həyat yoldaşı və iki qızı "Baires Fly S.A." şirkətinə məxsus özəl təyyarə ilə Ekvadorun Quayaquil şəhərinə yola düşüblər.

"Flightradar24" veb-saytının məlumatlarına görə, təyyarə çərşənbə günü gecə yarısından dərhal sonra (Qrinviç vaxtı ilə saat 03:00-da) Argentinanın şimal-şərqində yerləşən Puerto İquasu şəhərindən havaya qalxıb.

Daha əvvəl ABŞ mediası anonim mənbələrə istinadən xəbər vermişdi ki, Bolsonaro çərşənbə axşamı ABŞ-a gəlib.

ABŞ Dövlət Departamenti Bolsonaro və ailəsinə viza verəcəyini bildirib, lakin onların səyahət planlarını təsdiqləməyib.

Braziliya Ali Məhkəməsi Bolsonaronun ölkədən çıxışına qadağa qoyub və ondan pasportlarını təhvil verməsini tələb edib.

O, korrupsiya və çirkli pulların yuyulması ittihamları ilə bağlı istintaq altındadır. Seçkilərdə məğlub olması səbəbindən o, həmçinin parlament toxunulmazlığını da itirəcək.

Bolsonaro seçkilərdəki məğlubiyyətini qəbul etməyib. O, buna səbəb kimi, nəqliyyat çətinlikləri səbəbindən bəzi vətəndaşların səs verə bilməməsi üzündən səsvermə müddətinin uzadılması qərarını göstərib.


Reportyor.az 


KARUSEL / DÜNYA