"Reuters" agentliyinin çərşənbə axşamı verdiyi məlumata görə, Efiopiya Pravoslav Kilsəsi bildirib ki, son günlər Efiopiyanın Oromiya bölgəsində törədilən iki hücum nəticəsində azı 60 nəfər həlak olub.

Dini rəsmilər qurbanların hamısının xristian olduğunu bildiriblər, lakin hücumlara görə məsuliyyət daşıyanlar barədə əlavə təfərrüat verməyiblər.

Oromiya, təxminən 40 milyon əhalisi ilə Efiopiyanın ən böyük bölgəsidir. Bu bölgə uzun müddətdir ki, üsyanlar və müsəlman, protestant və pravoslav xristian icmaları arasında etnik gərginliklərlə üz-üzədir; silahlı qruplaşmalar isə bu gərginliklərdən getdikcə daha çox istifadə edirlər.

Efiopiya Pravoslav Tevahedo Kilsəsinin Müqəddəs Sinodu bazar ertəsi yaydığı bəyanatda bildirib ki, oktyabrın 20-də Merti rayonunda 14, oktyabrın 24-də isə Şerka rayonunda daha 46 dindar öldürülüb.

"Reuters"in məlumatına görə, Kilsə həmçinin 20-dən çox evin yandırıldığını və 20-dən çox insanın ağır xəsarətlərlə xəstəxanaya yerləşdirildiyini açıqlayıb.

Oktyabrın 24-də baş verən hücumla bağlı "Silahlı Münaqişələrin Yerləşməsi və Hadisələr üzrə Məlumat Layihəsi" (ACLED) AFP agentliyinə bildirib ki, zorakılığın "dini motivli olduğu və pravoslav xristianları hədəf aldığı" ehtimal edilir. Təşkilat buna sübut kimi pravoslav kilsəsinin talan edilməsi barədə məlumatları göstərib.

ACLED qeyd edib ki, bölgədə pravoslav xristianlara qarşı hücumlar 2023-cü ilin fevralından bəri artıb və son bir il ərzində zorakılıq daha da şiddətlənib.

Oromiyada fəaliyyət göstərən əsas üsyançı qruplaşma olan "Oromo Azadlıq Cəbhəsi"nin bu hadisələrdə iştirak edib-etmədiyi hələ müəyyən edilməyib.

Maliyyələşməsi dövlət tərəfindən təmin edilən, lakin inzibati cəhətdən müstəqil qurum olan Efiopiya İnsan Haqları Komissiyası bildirib ki, onlar "vəziyyəti izləyirlər" və "təfərrüatları araşdırırlar".

Reportyor.az 




KARUSEL / DÜNYA