ABŞ-da Qəzza müharibəsi ilə bağlı etirazların öncül simalarından biri olan Mahmud Xəlil Kolumbiya Universitetinə qayıdıb. Bu, onun Prezident Donald Trampın fələstinpərəst fəallara qarşı apardığı sərt təzyiq kampaniyası çərçivəsində 2025-ci ildə həbs olunmasından bəri universitetə ilk qayıdışıdır.

31 yaşlı fəal AFP agentliyinə bildirib ki, təxminən 100 nəfərin iştirak etdiyi və onun yeni memuarına həsr olunmuş tədbirdə iştirakı bir “qələbə”dir. O, Kolumbiya Universitetini “məni, eləcə də kampusdakı bütün fələstinli səsləri silməyə” çalışmaqda ittiham edib.

O, “Ayvi Liqası”na (Ivy League) daxil olan bu ali təhsil müəssisəsini 2024-cü ildə tələbə etirazlarına verdiyi reaksiyaya görə sərt tənqid edib. Həmin reaksiya Nyu-York polisinin Manhetten kampusundakı etirazçıları sərt güc tətbiq edərək ərazidən uzaqlaşdırmasına icazə verilməsini də əhatə edirdi.

Kolumbiya Universiteti o vaxt bildirmişdi ki, etirazlar təhlükəsizliyə təhdid yaradır.

Xəlil həmçinin universiteti, ABŞ immiqrasiya orqanları tərəfindən həbs olunmazdan əvvəl ona qarşı edilən təzyiqlərdən onu qorumamaqda günahlandırıb. O, heç bir cinayət ittihamı irəli sürülmədən üç ay həbsdə saxlanılıb və 2025-ci ilin iyununda sərbəst buraxılıb.

Xəlil müsahibəsində deyib: “Kolumbiya Universiteti kampusda çətin mövzuların müzakirəsi, etirazlara necə reaksiya verilməsi, insan hüquqları və beynəlxalq hüquqa necə sadiq qalınması məsələlərində bir nümunə ola bilərdi”.

“Onlar isə tam əksini seçdilər. Onlar vəhşiliyi seçdilər. Onlar repressiyanı seçdilər”, - deyə o bildirib.

Sosial mediada bəzi yəhudi qrupları Xəlilin geri qayıtmasına qarşı çıxmışdılar. Kolumbiya Universitetinin sözçüsü bildirib ki, ali məktəb “müxtəlif baxışlar arasında ciddi müzakirələrə, araşdırmalara və hörmətli dialoqa sadiqdir”.

ABŞ mediasında yer alan açıqlamada qeyd olunur: “Kolumbiya Universiteti müəllim heyətinin akademik tədbirlər təşkil etmək hüququnu dəstəkləyir. Bir şəxsin çıxış etmək üçün dəvət olunması, universitetin həmin şəxsin fikirlərini dəstəklədiyi anlamına gəlmir”.


Reportyor.az 



KARUSEL / DÜNYA