İndoneziya xilasediciləri Şimali Sumatra əyalətində bir neçə yerdə daşqın və torpaq sürüşməsi nəticəsində ən azı 27 nəfərin həyatına son qoyduqdan sonra palçığa basmış mikroavtobusda qalan sərnişinləri axtarır.

Reportyor.az xəbər verir ki, İndoneziyanın təbii fəlakət agentliyinin bildirdiyinə görə, ötən həftədən bəri əyalətdə yağan leysan yağışlar dörd müxtəlif rayonda daşqınlara və torpaq sürüşməsinə səbəb olub.
Şimali Sumatra polisinin sözçüsü Hadi Vahyudinin Reuters agentliyinə verdiyi məlumata görə, çərşənbə günü Deli Serdang kəndindəki torpaq sürüşməsi nəticəsində 7 nəfər ölüb, 20 nəfər yaralanıb.
Xilasedicilərin itkin düşmüş insanları, o cümlədən mikroavtobusda və digər maşınlarda selin vurduğu dağlıq vilayətlərarası yolda sıxışıb qalanları axtardığını deyən o, zərər çəkmiş insanların sayı ilə bağlı təxmini məlumat verə bilməyəcəyini bildirib.
Digər yerlərdə xilasedicilər həftə sonu başlayan axtarışlar zamanı 20 ölü tapıblar. Onlar hələ də itkin düşən iki nəfəri axtarırlar.
"Bu gün biz axtarışlarımızı itkin düşmüş insanları tapmaq və sürüşmə nəticəsində zərər çəkmiş yolları təmizləmək üçün cəmləşdiririk" deyən Hadi ekskavatorların yerləşdirildiyini əlavə edib.
Torpaq sürüşməsi və daşqınlar evlərə, məscidlərə və çəltik sahələrinə ziyan vurub.
Güclü yağışlar əyalətin paytaxtı Medanda da daşqınlara səbəb olub və bəzi seçki məntəqələrində regional seçkilər üçün səsvermənin gecikməsinə səbəb olub.
Ölkənin meteoroloji agentliyi xəbərdarlıq edib ki, La Nina fenomeni tropik arxipelaqda yağıntıları artırdığı üçün İndoneziyada 2024-cü ilin sonuna doğru ekstremal hava şəraiti gözlənilir.
KARUSEL / DÜNYA