ABŞ-ın baş diplomatı Marko Rubio Rusiya rəsmiləri ilə Ər-Riyadda apardığı danışıqlardan sonra ilk Yaxın Şərq turunun son mərhələsi üçün bu gün Birləşmiş Ərəb Əmirliklərinə səfər edib.

Reportyor.az xəbər verir ki, ABŞ dövlət katibi səhər Əbu-Dabiyə gəldikdən sonra BƏƏ prezidenti Şeyx Məhəmməd bin Zayed Əl Nəhyan və xarici işlər naziri Şeyx Abdullah bin Zayed Əl Nəhyanla görüşməli idi.

Çərşənbə axşamı Rubio Səudiyyə Ərəbistanının paytaxtında xarici işlər naziri Sergey Lavrovun başçılıq etdiyi Rusiya rəsmiləri ilə nadir danışıqlarda ABŞ nümayəndə heyətinə rəhbərlik edib.

Müzakirələr bir sıra məsələləri, o cümlədən Ukrayna müharibəsinə son qoymaq səylərini əhatə edib.

Rubionun BƏƏ-yə səfəri ABŞ prezidenti Donald Trampın müharibədən sonrakı Qəzza planını təqdim etməsindən sonra baş verib.

HƏMAS-ın viran edilmiş Fələstin ərazisində gələcək hər hansı rolunu rədd edən Tramp administrasiyası Qəzzada fələstinlilərin hər hansı yerdəyişməsinə qəti şəkildə qarşı olan ərəb ölkələrini ABŞ prezidentinin planına alternativlər təklif etməyə çağırıb.

Tramp müharibədən zərər çəkmiş Qəzza zolağının ABŞ-ın nəzarəti altına verilməsini və onun 2,4 milyon əhalisinin əsasən qonşu İordaniya və Misirə köçürülməsini təklif edib.

Bazar ertəsi Səudiyyə Ərəbistanında Rubio vəliəhd şahzadə Məhəmməd bin Salman ilə görüşərək, "Qəzza üçün regional təhlükəsizliyə töhfə verən tənzimləmənin vacibliyini" vurğuladı.

Bazar günü Qüdsdə ilk dayanacağında ABŞ dövlət katibi İsrailin baş naziri Benyamin Netanyahuya ABŞ-ın sarsılmaz dəstəyini təklif edərək, İsrailə yanvarın 19-da kövrək atəşkəsin qüvvəyə mindiyi Qəzzada istədiyi kimi davam etməsi üçün yaşıl işıq yandırdı.
KARUSEL / DÜNYA