İndoneziya Livanda üç sülhməramlısının öldürülməsindən sonra Yaxın Şərqdəki müharibə edən tərəfləri beynəlxalq humanitar hüquqa hörmət etməyə çağırdı və təcili BMT Təhlükəsizlik Şurasının iclasının keçirilməsini istəyib.

Müdafiə Nazirliyinin sözçüsü Riko Rikardo Sirait verdiyi açıqlamada bildirib ki, sülhməramlı qüvvələrin təhlükəsizliyi ən vacib prioritet olmalıdır. Münaqişənin bütün tərəfləri beynəlxalq humanitar hüquqa hörmət etməyə və sülhməramlı personalın təhlükəsizliyini təmin etməyə çağırılır.

Livandakı BMT Müvəqqəti Qüvvələri (UNIFIL) iki şəxsin bazar ertəsi partlayış nəticəsində, digərinin isə bazar günü axşam saatlarında mərmi onların mövqeyinə dəyəndə öldüyünü bildirib.

BMT qüvvələri ayrı-ayrı hadisələrlə bağlı araşdırma başlatdığını bildirib.

Dəhşətli hücumları pisləyən İndoneziya xarici işlər naziri Sugiono çərşənbə axşamı günü ölümləri BMT-nin baş katibi Antonio Quterreşlə müzakirə etdiyini və təcili BMT Təhlükəsizlik Şurasının iclasını, eləcə də sürətli, hərtərəfli və şəffaf araşdırma tələb etdiyini bildirib.

“BMT sülhməramlılarının təhlükəsizliyi müzakirə mövzusu deyil və hər zaman qorunmalıdır”, - deyə bir çox indoneziyalı kimi yalnız bir adla tanınan Sugiono bildirib.

BMT-nin sülhməramlı əməliyyatlar üzrə baş katibinin müavini Jan-Pyer Lakroua bu qəbuledilməz hadisələri qınayıb və sülhməramlıları təhlükə altına alan bütün hərəkətlərin dayandırılmalı olduğunu söyləyib.

Daimi Təhlükəsizlik Şurasının üzvü Fransa bu məsələ ilə bağlı qurumun iclasını tələb etdiyini bildirib.


Reportyor.az 



KARUSEL / DÜNYA