Son beş ildə Çinin Qırğızıstana birbaşa investisiyası 1,85 milyard dollara çatıb.

Bu barədə Baş nazirin müavini Erlist Akunbekov Qırğızıstan-Çin İnvestisiya Forumunda bildirib. Tərəflər həmçinin birgə istehsala diqqət yetirirlər.

"Qırğızıstanın sənaye sektorunda Çinin iştirakı ilə 968 müəssisə qeydiyyatdan keçib ki, onlardan 190-ı fəaliyyət göstərir. 2025-ci ildə Çinin birbaşa investisiyasının təxminən 75%-i və ya təxminən 466 milyon dolları istehsal sənayesinə yönəldilib. Növbəti addım istehsalın, nəqliyyat texnologiyalarının və Qırğızıstan, AİB və qonşu ölkələrin bazarları üçün məhsulların genişmiqyaslı lokallaşdırılmasıdır", - deyə Erlist Akunbekov bildirib.

Qırğızıstan və Çin logistika sahəsində də əməkdaşlığı genişləndirirlər. Yeni layihələrdən biri Çinin Sian şəhərində Qırğızıstan nəqliyyat mərkəzidir. Qırğızıstan onun tikintisi üçün doqquz hektarlıq torpaq sahəsi əldə edir.

“Sian-Kaşqar-Oş marşrutu oradan keçəcək və bununla da Oşun mühüm regional logistika mərkəzi kimi inkişafına töhfə verəcək. Bu təşəbbüsdən əlavə, artıq başa çatmış layihələr də var. Məsələn, ötən qış Mərkəzi Asiyada bərk tullantıların təkrar emalından elektrik enerjisi istehsal edən ilk eko-texnoloji zavod açılıb”, - deyə Qırğızıstan Respublikası Prezidenti yanında Milli İnvestisiya Agentliyinin rəhbəri Ravşanbek Sabirov qeyd edib.

İnvestisiya forumu Çin sədri Si Cinpinin Qırğızıstana dövlət səfəri ərəfəsində keçirilib.

Çin lideri 30 avqustda Prezident Sadır Japarovun dəvəti ilə Bişkekə gəlib.


Reportyor.az 






KARUSEL / İQTİSADİYYAT