Yəməndə legitimliyin bərpası üzrə Koalisiyanın rəsmi nümayəndəsi, general-mayor Türki əl-Maliki bəyanat verib.

Bu barədə Krallığın yerli mediası xəbər verir. 

Bəyanatda deyilir:

"Krallıq ərazisinin, onun vətəndaşlarının və sakinlərinin təhlükəsizliyini qorumaq məqsədilə özünümüdafiəyə dair təbii və legitim hüquqa əsaslanaraq, həmçinin Krallıqda və Yəməndə mülki şəxsləri və mülki obyektləri ballistik raketlər və pilotsuz uçuş aparatları (PUA) vasitəsilə hədəf almağa cəhd edən terrorçu husi milislərinin təkrarlanan hücumlarına cavab olaraq, Koalisiyanın Birləşmiş Qüvvələr Komandanlığı təhdid mənbələrini zərərsizləşdirmək məqsədilə hərbi əməliyyat həyata keçirib.
Bu xüsusi əməliyyat çərçivəsində terrorçu husi milislərinin nəzarətində olan ərazilərdəki legitim hərbi hədəflər məhv edilib və zərərsizləşdirilib. Əməliyyat zamanı ballistik raketlərin saxlanması üçün istifadə olunan beş tunel, dörd ballistik raket buraxılış qurğusu və bir raket anbarı məhv edilib. Əməliyyat həmçinin husi milislərinin nəzarətindəki ərazilər arasındakı təchizat xətlərinin kəsilməsinə yönəlib; bununla yanaşı, Yəmən daxilindəki cəbhə xətlərində milislərin istehkamları, canlı qüvvəsi və hərbi texnikası hədəf alınıb.
Koalisiyanın Birləşmiş Qüvvələr Komandanlığı mülki şəxsləri və mülki obyektləri terrorçu husi milislərinin amansız hücumlarından qorumaq, eləcə də Yəmən daxilindəki günahsız mülki əhalini milislərin zülmündən, onların yəmənliləri müxtəlif vasitələrlə öldürmək və onlara qarşı zorakılıq törətmək cəhdlərindən müdafiə etmək üçün bu qruplaşmaya qarşı çəkindirici tədbirləri davam etdirəcək. Həyata keçirilən hərbi əməliyyat beynəlxalq humanitar hüquqa və onun adət normalarına tam uyğundur."

Reportyor.az 




KARUSEL / DÜNYA