"Azərbaycan Hava Yolları" (AZAL) aviaşirkətinin ilkin araşdırma nəticələrinə görə, “Embraer 190” təyyarəsinin qəzası fiziki və texniki kənar müdaxilə səbəbindən baş vermiş ola bilər.

Reportyor.az xəbər verir ki, bu barədə AZAL-ın bəzi Rusiya şəhərlərinə uçuşların dayandırılması ilə bağlı açıqlamasında bildirilib.
Bildirilib ki, bu səbəbdən araşdırmanın yekun nəticələri açıqlanana qədər Rusiyanın 10 hava limanına uçuşlar dayandırılıb.

Qeyd edək ki, dekabrın 25-i Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.
Aktau şəhərində qəzaya uğrayan Bakı-Qroznı reysini yerinə yetirən “Embraer 190” təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub.
Qəzadan sonra xəstəxanaya 27 şəxs daxil olub. Onlardan 15 nəfər Azərbaycan Respublikasının, 8 nəfər Rusiya Federasiyasının, 3 nəfər Qırğızıstan Respublikasının vətəndaşıdır. Bir nəfərin şəxsiyyəti, hələlik müəyyən edilməyib.
Hər iki pilot da daxil olmaqla 3 ekipaj üzvü həlak olub, iki ekipaj üzvü isə sağ qalıb.
26 dekabr tarixində Azərbaycana 14 yaralı və 4 nəfərin cəsədi gətirilib.
Təyyarənin “qara qutu”su artıq aşkar edilib və onun beynəlxalq aviasiya konvensiyalarına uyğun olaraq təhlili üçün prosedurlar aparılır. Hazırda qəzanın səbəbləri araşdırılır. Bütün zəruri tədqiqatlar və məlumatların təhlili başa çatdıqdan sonra yekun nəticələr açıqlanacaq.

MANŞET / KARUSEL / HADİSƏ