Birləşmiş Ərəb Əmirliklərinin (BƏƏ) milli bayramı – müstəqilliyinin 52-ci ildönümü münasibətilə bu ölkənin Azərbaycandakı səfirliyi rəsmi qəbul təşkil edib.
BƏƏ-in Azərbaycandakı səfiri  Mohammed AlBluşi qonaqları salamlayaraq, ölkəsinin əldə etdiyi uğurlardan söz açıb. 
BƏƏ dünya ölkələri ilə qarşılıqlı hörmət əsasında möhkəm əlaqələr qurmağa və ölkələr arasında mübahisələrin dialoq və dinc vasitələrlə həllinə sadiqliyinə, beynəlxalq sabitliyin və sülhün dəstəklənməsinə və insanların birgə yaşayışının təşviqinə töhfə verməyə müvəffəq olub: "BƏƏ  Prezidenti Əlahəzrət Şeyx Mohammed bin Zayed Al Nahyan BƏƏ-də 2023-cü ili "Sabah üçün Bugün" şüarı altında "Davamlılıq ili" elan edib. "Davamlılıq İli" BƏƏ-nin davamlılıq problemlərini həll etmək üçün beynəlxalq kollektiv fəaliyyətin gücləndirilməsində göstərdiyi səyləri və daha firavan gələcək qurmaq üçün hər kəsə fayda verən innovativ həllər axtarışında onun rolunu vurğulamaq məqsədi daşıyır. Bu gün BƏƏ dünya miqyasında davamlı iqtisadi inkişaf sahəsində aparıcı modela çevrilib və iqtisadi artım, rifah və ətraf mühitin mühafizəsi arasında tarazlığa nail olmağa yönəlmiş iddialı strategiyalar qəbul edir". 
BƏƏ kosmosa və elmlərə olan marağını davam etdirir və bu sektorda qabaqcıl bir iz əldə etməyə çalışır. Keçən ilin sentyabrında ölkə, BƏƏ astronavtı Sultan Əl Neyadinin uzun kosmos səyahətindən sonra Yerə qayıtmasını və Beynəlxalq Kosmik Stansiyada uzun müddət qalan və kosmosda gəzinti həyata keçirən ilk ərəb astronavtı kimi böyük nailiyyətini qeyd edib. BƏƏ, həmçinin ən böyük və ən qabaqcıl peyklərdən biri olan "Mohammed bin Zayed sat" (MBZ-SAT) peykini 2024-cü ildə orbitə çıxarmağa hazırlaşır. BƏə kosmos sahəsində tərəfdaşları ilə əməkdaşlıq çərçivəsində elmi töhfələrini artırmağa davam edəcək.

BƏƏ 2023-cü ili "Sabah üçün Bugün" şüarı ilə "Dayanıqlılıq İli" elan edib və öz prioritetləri sırasına ekoloji davamlılıq agahlığının təşviqini və iqlim dəyişikliyi ilə bağlı problemlərin həllini qoyur. BMT İqlim Dəyişikliyi üzrə Çərçivə Konvensiyasına üzv ölkələrin konfransının iyirmi səkkizinci
sessiyası COP28 BƏƏ-də noyabrın 30-dan dekabrın 12-dək Expo City Dubayda keçiriləcək və planetimizin üzləşdiyi riskləri azaltmaq səyi ilə dünya liderlərini və ekspertləri bir araya gətirəcək". Səfir BƏƏ-in BMT Təhlükəsizlik Şurasındakı fəaliyyətindən də danışdı: "BƏƏ Təhlükəsizlik Şurasına üzv olduğu müddətdə münaqişənin dinc yolla həllini təşviq etmək, humanitar yardıma üstünlük vermək, sülhü qorumaq, qlobal sağlamlıq böhranlarını həll etmək, bəşəriyyətə xidmət etmək üçün innovasiya imkanlarından istifadə etmək və terrorizmlə mübarizə üçün beynəlxalq sistemin inkişaf etdirilməsi kimi dövrümüzün bəzi kritik çağırışlarının həllində mühüm rol oynamışdır. BƏƏ-nin beynəlxalq ictimaiyyətdəki səyləri ayrı-seçkilik olmadan böhran və fəlakətlərdən zərər çəkmiş insanları dəstəkləməklə və bütün dünyada hökumətlərin və xalqların bacarıqlarını artırmaq üçün beynəlxalq tərəfdaşlarla işləməklə onun qlobal problemlərin həllinə balanslı və məsuliyyətli yanaşmasını təcəssüm etdirir. Milli sərvət baxımından BƏƏ beynəlxalq yardımın ən böyük donorlarından biri olaraq qalır. BƏƏ yarandığı gündən beynəlxalq təşkilatlarla sıx əməkdaşlıq etməklə beynəlxalq əlaqələrini gücləndirmək və genişləndirməkdə maraqlıdır və çoxtərəfli əməkdaşlığa möhkəm sadiqliyini əks etdirməklə və bütün sektorlarda beynəlxalq prioritetlərə nail olmaqla 150-dən çox təşkilata üzv olmuşdur. BƏƏ dünya ölkələrinin ümumi maraqlarına əsaslanan və sülhün, sabitliyin, firavanlığınvə xalqların rifahının təşviqinə yönəlmiş xarici siyasətini davam etdirəcək."
Ölkələrimiz arasıdan əlaqələrə toxunan diplomat deyib ki, hər iki dövlət liderlərinin qarşılıqlı səfərləri, davamlı artan ticari, iqtisadi və mədəni mübadilənin səviyyəsi, həmçinin BƏƏ-dən gələn turistlərin sayının artması, ikitərəfli əlaqələrin müxtəlif sahələrdə güclənməsinə dəlalət edir." Səfir qeyd edib ki, iki ölkə vətəndaşları vizadan azad edilib, bundan başqa, bərpa olunan enerjinin istehsalı, neft-qaz və digər sahələrdə 40 sənəd, anlaşma memorandumu və sazişlər imzalanıb: "Bu, iki ölkə arasında müxtəlif sahələrdə ikitərəfli əlaqələrin möhkəmliyini əks etdirir". Səfir deyib ki, BƏƏ Əlahəzrət Şeyx Mohamed bin Zayed Al Nahyanın rəhbərliyi altında regional və beynəlxalq arenalarda mövqeyini və fəal rolunu gücləndirməklə milli inkişaf və iqtisadi yüksəliş yolunu davam etdirir. 
Azərbaycan hökuməti adından BƏƏ xalqını bayram münasibətilə təbrik edən elm və təhsil naziri Emin Əmrullayev ölkələrimiz arasında əlaqələrin yüksək səviyyədə olduğunu deyib. Nazir bildirib ki, Azərbaycan BƏƏ ilə münasibətlərə xüsusi önəm verir. Qarşılıqlı hörmətə, möhkəm dostluğa və qardaşlığa, bunu daha da zənginləşdirən İslam irsinə əsaslanan əlaqələrimiz həm ikitərəfli formatda, həm də beynəlxalq təşkilatlar çərçivəsində yüksələn xətt üzrə inkişaf edir. BƏƏ 1991-ci il dekabrın 26-da Azərbaycanın müstəqilliyini tanıyan ilk dövlətlərdən biridir: "1992-ci ildə ölkələrimiz arasında diplomatik münasibətlər qurulandan indiyə qədər ikitərəfli əməkdaşlıq sürətlə inkişaf edir. Azərbaycanla BƏƏ arasında mövcud dostluq və tərəfdaşlıq münasibətləri qarşılıqlı hörmət və əməkdaşlıq prinsiplərinə əsaslanır və iqtisadiyyat, enerji, turizm, təhsil və bir çox digər sahələri əhatə edir. Ölkələrimiz ikitərəfli təmaslarla yanaşı, İslam Əməkdaşlıq Təşkilatı, Qoşulmama Hərəkatı və digər beynəlxalq platformalar çərçivəsində də əməkdaşlıq edir".
Nazir Əmrullayev qarşılıqlı yüksək səviyyəli səfərlərə də toxunub: "Bu əlaqələr yüksək səviyyəli qarşılıqlı səfərlərlə daha da möhkəmlənir. Azərbaycan prezidenti İlham Əliyevin 2023-cü ilin yanvarında BƏƏ-yə səfəri əməkdaşlığın inkişafı üçün böyük potensialın olduğunun və ikitərəfli münasibətlərin yeni mərhələyə qədəm qoyduğunun əyani göstəricisidir. Bildiyiniz kimi, Azərbaycan Respublikasının əraziləri 30 ilə yaxın idi ki, işğal altındaydı, 1 milyona yaxın qaçqın və məcburi köçkün öz doğma yurd-yuvasından didərgin düşmüşdü. Prezident İlham Əliyevin rəhbərliyi altında igid ordumuz ölkəmizin ərazi bütövlüyünü bərpa etdi. Bu baxımdan, BƏƏ-nin bir neçə şirkətinin işğaldan azad edilmiş ərazilərdə həyata keçirilən bərpa və tikinti layihələrində iştirak üçün müraciət etməsi bizi sevindirir". Əmrullayev bildirib ki, BƏƏ Azərbaycanın mühüm ticarət və iqtisadi tərəfdaşıdır: "2023-cü ilin yanvar-sentyabr aylarında Azərbaycanla BƏƏ arasında ticarət dövriyyəsi 99,87 milyon dollar təşkil edib. 2022-ci ilin müvafiq dövrü ilə müqayisədə 2023-cü ilin yanvar-sentyabr aylarında BƏƏ ilə ticarət dövriyyəsi 16 faiz artıb. Azərbaycanda BƏƏ investisiyalı 385 kommersiya qurumu sənaye, kənd təsərrüfatı, nəqliyyat, tikinti, ticarət, xidmət sahəsində qeydiyyatdan keçib. Azərbaycan Prezidentinin Sərəncamına əsasən, ölkəmizlə BƏƏ arasında hərtərəfli iqtisadi tərəfdaşlıq haqqında Sazişlə bağlı danışıqlara 2023-cü ilin aprel ayında başlanılıb. Bundan əlavə, Azərbaycanın Ticarət Nümayəndəliyi 2017-ci ildən, “Azərbaycan Ticarət Evi” isə 2019-cu ildən Dubayda fəaliyyət göstərir. Enerji sahəsində əməkdaşlıq ikitərəfli təmasların digər mühüm istiqamətlərindən biridir. Bu kontekstdə BƏƏ-nin “Masdar” şirkətinin Azərbaycanda həyata keçirilən enerji layihələrində fəal iştirakına diqqəti cəlb etmək istərdim”.

Nazir deyib ki, BƏƏ-nin “Masdar” şirkəti tərəfindən 2023-cü ilin oktyabrında istifadəyə verilmiş Qaradağ Günəş Elektrik Stansiyasının tikintisi və Regionda ən böyük günəş elektrik stansiyası kimi və “Masdar”la Azərbaycan hökuməti arasında Prezident İlham Əliyevin iştirakı ilə imzalanmış sənədlər xüsusi vurğulanmalıdır.
“Hesab edirəm ki, xalqlarımız arasında təmaslar ikitərəfli əməkdaşlığın dinamik inkişafını əsaslandıran əsas amillərdən biridir. Bu əlaqələrin qurulmasında elm və təhsil sahələri xüsusi əhəmiyyət kəsb edir. Biz Azərbaycanın ali təhsil müəssisələrində təhsil alan BƏƏ vətəndaşlarının sayının artmasında həqiqətən maraqlıyıq və inanırıq ki, tələbə və akademik heyətin mübadiləsi, elmi tədqiqatlar və elmi tədqiqatların aparılması üçün daha geniş imkanlar var". 

Tədbir konsert proqramı ilə davam edib.


KARUSEL / SİYASƏT