İsrailin ifrat sağçı milli təhlükəsizlik naziri İtamar Ben-Qvir Baş nazir Benyamin Netanyahuya BMT Təhlükəsizlik Şurası Fələstin dövlətçiliyinin lehinə səs verərsə, Fələstin prezidenti Mahmud Abbası həbs etməyə çağırıb.

Bu barədə AFP xəbər verir.

"Əgər onlar bu uydurma dövlətin tanınmasını sürətləndirsələr, BMT bunu tanıyırsa, siz, cənab Baş nazir, hər cəhətdən terrorçu olan Fələstin Muxtariyyətinin yüksək vəzifəli rəsmilərinin hədəfli şəkildə sui-qəsd edilməsini əmr etməlisiniz və siz... Əbu Mazenin (Abbas) həbs olunmasını əmr etməlisiniz", - deyə Ben Qvir İsrail parlamenti Knessetdə keçirilən mətbuat konfransında bildirib.

BMT Təhlükəsizlik Şurası bazar ertəsi günü ABŞ prezidenti Donald Trampın Qəzza sülh planını dəstəkləyən Vaşinqtonun təklif etdiyi qətnamə layihəsinin lehinə səs verib.

Əvvəlki layihələrdən fərqli olaraq, son versiyada gələcək Fələstin dövlətinin yaradılması ehtimalı qeyd olunur.

Fələstin Muxtariyyəti Ben-Qvirin çağırışını qətiyyətlə pisləyib.

Ramallahda yerləşən xarici işlər nazirliyinin açıqlamasında deyilir: “Fələstin Dövləti təsdiqləyir ki, bu cür sistematik təhrik sülhü rədd edən və regional və beynəlxalq təhlükəsizliyi təhdid edən siyasi düşüncə tərzini ortaya qoyur”.

Qərarda ölkələrə bu eskalasiyanın qarşısını almaq, hesabatlılıq mexanizmlərini aktivləşdirmək və terrorçu dilin və təhriklərin idarəetmə vasitəsi kimi istifadəsini rədd etmək üçün təcili, konkret addımlar atmağa çağırış edilib.

Qətnamə Təhlükəsizlik Şurasının Qəzzada keçid administrasiyası və müvəqqəti beynəlxalq təhlükəsizlik qüvvələri üçün xeyir-duasını verəcək və ABŞ-ın vasitəçiliyi ilə ötən ay əldə edilən və iki illik müharibəni dayandıran razılaşmanın ikinci mərhələsinə başlayacaq.

İsrail rəhbərliyi Fələstin dövlətinin hər hansı bir ehtimalını rədd etməkdə yekdil olub.

“Hər hansı bir ərazidə Fələstin dövlətinin yaradılmasına qarşı çıxmağımız dəyişməyib”, Netanyahu bazar günü keçirilən kabinet iclasında bildirib.

Netanyahu, şənbə günü onu Qərb ölkələri tərəfindən Fələstin dövlətçiliyinin tanınması dalğasına cavab verməməkdə günahlandıran ifrat sağçı maliyyə naziri Bezalel Smotrich də daxil olmaqla, koalisiya üzvlərinin tənqidinə məruz qalıb.

Smotriç Netanyahunu X-də "bütün dünyaya aydın olacaq şəkildə uyğun və qətiyyətli bir cavab hazırlayın - heç bir Fələstin dövləti vətənimizin torpaqlarında yaranmayacaq" deyə çağırdı.

Baş nazir bazar günü "heç kimin təsdiqinə, tvitinə və ya mühazirəsinə ehtiyac duymadığını" söyləyib.

Reportyor.az



KARUSEL / DÜNYA