Keniyada üzvlərini aclıqdan ölümə sürükləyən bir sektanın lideri, 190 uşağın qətlində təqsirli bilinərək, cümə günü çıxarılacaq hökmlə ölüm cəzası ilə üzləşə bilər.

2023-cü ildən bəri sahil kurortu Malindi yaxınlığındakı sektaya məxsus ərazidə yüzlərlə cəsəd aşkar edilib. Bu hadisə "Şakahola meşəsi qırğını" kimi tanınır.

Özünü pastor elan edən Pol Makkenzi, ardıcıllarını "İsa ilə görüşmək" üçün özlərini ac saxlamağa və nəticədə ölməyə təşviq etməkdə ittiham olunur.

Ötən ay o, 28 nəfər digər təqsirləndirilən şəxslə birlikdə, 2021-ci ilin yanvarı ilə 2023-cü ilin sentyabrı arasında 190 uşağın və bir böyük insanın qətlində təqsirli bilinib. Onun vəkili qərardan apellyasiya şikayəti verəcəklərini bildirib.

O, həmçinin ayrı-ayrılıqda adam öldürmə və terrorçuluq ittihamları ilə üzləşir, lakin bu ittihamları rədd edir.

Baş Prokurorluq bu həftə məhkəməyə müraciət edərək, insan itkilərinin miqyasını və onun hərəkətlərinin yaratdığı təhlükəni əsas gətirərək, Makkenziyə ölüm cəzası verilməsini tələb edib.

Baş prokuror müavini Cami Yamina bildirib ki, "ittiham tərəfi Makkenziyə ölüm cəzası verilməsini dəstəkləyir; əlbəttə, onun cəzasını yüngülləşdirə biləcək hallar, peşmanlığı, təəssüf hissi və islah olunma ehtimalı nəzərə alınmaqla".

Keniyada qanunvericilik ölüm cəzasını nəzərdə tutsa da, ölkədə 1987-ci ildən bəri heç bir edam hökmü icra olunmayıb.

Prokurorlar həmçinin məhkəmədən Makkenzi ilə birlikdə mühakimə olunan digər şəxslərə ömürlük həbs cəzası verilməsini istəyiblər. Onlar bunu belə əsaslandırıblar ki, həmin şəxslər "Makkenzi tərəfindən ciddi şəkildə ideoloji təsirə məruz qalıblar və yenidən cinayət törətmək riskləri var".

Məhkəmə prosesi zamanı ittiham tərəfinin təqdim etdiyi təxminən 120 şahid ifadə verib.

Şahidlərin sözlərinə görə, bu hərəkat rəsmi təhsili "şeytani" hesab edir, müasir tibbə və xəstəxanalara şeytanın alətləri kimi baxır və üzvlərindən xarici dünya ilə əlaqəni tam kəsməyi tələb edirdi.

Keçmiş taksi sürücüsü olan Makkenzi 2023-cü ilin aprelində həbs edilib. Həbsə səbəb bir hüquq müdafiə qrupunun hakimiyyət orqanlarına məlumat verməsi və ardınca bəzi üzvlərin Keniyanın sahil bölgəsindəki Şakahola meşəsində yerləşən 325 hektarlıq (800 akr) ərazidən xilas edilməsi olub. Keniya Milli İnsan Hüquqları Komissiyası 2024-cü ildə ölənlərin sayının 429 nəfər olduğunu açıqlayıb. Qurbanların bəzilərinin kimliyi hələ də müəyyən edilməyib.

Makenzinin əvvəllər iki dəfə həbs olunub, lakin sonradan sərbəst buraxıldığı məlum olduqdan sonra, bu hadisə dini təşkilatlara qarşı daha sərt tənzimləmələrin tətbiq edilməsi ilə bağlı çağırışları gücləndirib.


Reportyor.az 



KARUSEL / DÜNYA