Türkmənistanın İslamabaddakı səfirliyinin məlumatına görə, Türkmənistan-Əfqanıstan-Pakistan-Hindistan (TAPI) boru kəməri vasitəsilə Əfqanıstan və Pakistana təbii qaz tədarükünün 2027-ci ildə başlaması gözlənilir.

Bu barədə Əfqanıstan mediası xəbər verir. 

Türkmənistan səfiri Atacan Movlamov bildirib ki, boru kəmərinin strateji əhəmiyyət kəsb edən Sərhədabad-Herat hissəsinin tikintisinin bu ilin sonunadək başa çatdırılması nəzərdə tutulur.

Movlamov bu fikirləri Lahor Ticarət və Sənaye Palatası tərəfindən İslamabadda təşkil edilən səfirlər üçün şam yeməyi zamanı səsləndirib.

O qeyd edib ki, TAPI və digər regional enerji layihələrinin həyata keçirilməsi Pakistanın enerji təhlükəsizliyini gücləndirməklə yanaşı, sənaye inkişafı və iqtisadi artım üçün yeni imkanlar yarada bilər.

Ümumi uzunluğu 1800 kilometr olması planlaşdırılan boru kəməri Türkmənistanın nəhəng "Galkınış" qaz yatağından Əfqanıstan ərazisi vasitəsilə Pakistan və Hindistana illik 33 milyard kubmetrədək təbii qazın nəql edilməsi üçün nəzərdə tutulub.

Türkmənistan TAPI-ni qaz ixracının şaxələndirilməsi və regional iqtisadi əməkdaşlığın gücləndirilməsi baxımından əsas layihə hesab edir.

TAPI üçün əsas resurs bazası olan "Galkınış" yatağı, təxminən 27 trilyon kubmetrdən çox ehtiyatı ilə dünyanın ən böyük qaz yataqları sırasına daxildir.

Layihə illərlə gecikmələrlə üzləşsə də, son dövrlərdəki tikinti işləri və regional enerji sektorundakı inkişaf prosesləri Mərkəzi Asiya qaz ehtiyatları ilə Cənubi Asiya enerji bazarları arasında potensial əlaqələndirici vasitə kimi TAPI-yə marağı yenidən artırıb.


Reportyor.az 


KARUSEL / İQTİSADİYYAT