Milli Məclisin sədri Sahibə Qafarova Türkiyə Böyük Millət Məclisinin (TBMM) 29-cu sədri Mustafa Şentopa məktub ünvanlayıb.
Parlamentin Mətbuat və ictimaiyyətlə əlaqələr şöbəsindən bildirilib ki, Sahibə Qafarova məktubda Mustafa Şentopun TBMM-in sədri kimi fəaliyyəti dövründə qardaş ölkə parlamentinin əldə etdiyi uğurları qeyd edərək, bu dövrdə qardaş ölkələrimizin ali qanunvericilik orqanları arasındakı əlaqələrin daha da inkişaf etdiyini və keyfiyyətcə yeni səviyyəyə çatdığını vurğulayıb.
Qeyd edək ki, bu gün Milli Məclisin sədri Sahibə Qafarovanın Mustafa Şentopla telefon danışığı da olub. Telefon danışığında Sahibə Qafarova Mustafa Şentopun TBMM-in sədri kimi fəaliyyəti dövründə parlamentlərarası əlaqələrin inkişafına verdiyi töhfəyə görə bir daha təşəkkür edib, ona gələcək fəaliyyətində uğurlar arzulayıb.
Mustafa Şentop öz növbəsində Türkiyə parlamentinin sədri kimi fəaliyyətinə verilən yüksək dəyərə görə Sahibə Qafarovaya dərin minnətdarlığını bildirib. O, bundan sonrakı fəaliyyəti dövründə də dost və qardaş xalqlarımız arasındakı münasibətlərin daha da dərinləşməsinə çalışacağını ifadə edib.

KARUSEL / SİYASƏT