Rəsmilərin məlumatına görə, Avropa Kosmik Agentliyi (ESA) iqlim dəyişikliyi ilə əlaqəli ekstremal hava hadisələrinin monitorinqini təkmilləşdirmək məqsədilə hazırlanmış iki peyki uğurla orbitə çıxarıb.

Hadisə yerində olan AFP jurnalistinin məlumatına əsasən, Avropanın "Vega C" raketi bazar ertəsi saat 22:21-də (çərşənbə axşamı Qrinviç vaxtı ilə 01:21-də) Fransa Qvianasındakı Kuru Kosmik Mərkəzindən "Sentinel 3C" və "FLEX" peyklərini daşıyaraq kosmosa buraxılıb.

Hər iki peyk buraxılışdan təxminən iki saat sonra günəş-sinxron orbitə yerləşdirilib.

"FLEX" (Fluorescence Explorer) peyki istilik dalğalarının bitki örtüyünə təsiri ilə bağlı məlumatlar təqdim edəcək. O, bitkilərin fotosintez prosesi zamanı yaydığı zəif qırmızı işığı – flüoresensiyanı müşahidə edəcək; fotosintez elə bir prosesdir ki, bitkilər bu zaman karbon qazını udur, su və işıqdan istifadə edərək onu böyümə üçün enerjiyə çevirir və eyni zamanda havaya oksigen buraxır.

Avropa İttifaqının "Copernicus" Yer müşahidə proqramının bir hissəsi olan ikinci peyk – "Sentinel 3C" isə dəniz mühitinin xüsusiyyətlərini, o cümlədən temperaturu, dalğa hündürlüyünü və okean axınlarını ölçəcək. O, həmçinin kənd təsərrüfatı məhsuldarlığını artırmağa və ərzaq böhranlarının qarşısını almağa kömək etmək məqsədilə torpaqdan istifadə və torpaq örtüyü vəziyyətini izləyəcək.

ESA-nın Yer müşahidə proqramları üzrə direktoru Simonetta Çeli Kurudan verdiyi açıqlamada bildirib ki, bu cür missiyalar "üzləşdiyimiz iqlim dəyişikliyi" ilə mübarizədə "həyati əhəmiyyət kəsb edir".

Reportyor.az 




KARUSEL / DÜNYA